Sábháilteacht agus Slándáil

Mionchoireacht

Tá an choiriúlacht i Niue íseal ach is féidir le mionchoireacht tarlú.

Molaimid duit réamhchúraimí bunúsacha a ghlacadh agus tú ag taisteal chuig Niue:

• Ná bíodh do chárta creidmheasa, ticéid taistil agus airgead á n-iompar agat ag aon am amháin - fág airgead tirim breise agus earraí luachmhara in áit shábháilte.
• Ná hiompar do phas murach go bhfuil géarghá leis agus fág cóip de do phas (agus cáipéisí taistil agus árachais) le do theaghlach nó le cairde sa bhaile.
• Déan iarracht gan suimeanna móra airgid a nochtadh go poiblí. Níl aon UMBanna in Niue ach ofrálann roinnt gnólachtaí aisairgead. Úsáidtear dollar na Nua-Shéalainne.
• Coinnigh súil ghéar ar do chuid giuirléidí pearsanta agus coinnigh greim orthu in áiteanna poiblí.
• Seachain sráideanna agus staighrí dorcha gan soilse, agus déan socrú go mbaileofar agus go bhfágfar thú chomh gar agus is féidir do bhealach isteach d’óstáin nó d’árasáin

Léirsithe

D’fhéadfaí go dtarlódh cruinnithe poiblí agus léirsithe ó am go ham.

Molaimid go bhfanann tú amach ó léirsithe agus go leanann tú comhairle na n‑údarás áitiúil.

An Dúlra agus an Aeráid

Gníomhaíocht sheismeach

​Tá Niue suite i gcrios atá gníomhach go seismeach, rud a bhféadfadh súnámaithe a bheith mar thoradh air, go fiú má tharla crith talún achar suntasach ar shiúl.​ Ba cheart duit cloí le haon treoracha a eisíonn na húdaráis áitiúla maidir le bagairtí súnámaí.​

Stoirmeacha trópaiceacha agus Cioclóin

In Niue, táthar ag súil le gaotha láidre ó thús mhí na Samhna go dtí deireadh mhí Aibreáin, agus is féidir le cuid acu éirí ina gcioclóin. I rith an ama seo, ceaptar go mbeidh dianbháisteach agus tuilte ann agus sciorrthaí talún ina dhiaidh sin.

Tá an aeráid trópaiceach. Maireann séasúr na báistí ó Shamhain go hAibreán agus tarlaíonn na séasúir thirime the ó Bhealtaine go Deireadh Fómhair

Moltar duit monatóireacht a dhéanamh ar nuashonruithe aimsire áitiúla agus idirnáisiúnta ón Eagraíocht Dhomhanda Mheitéareolaíochta (EDM), nó ó shuíomh gréasáin Sheirbhís Mheitéareolaíochta Fhidsí​.​

Snámh

Is gníomhaíochtaí coitianta iad an snámh, snorcláil agus tumadóireacht. Glac le comhairle áitiúil sula dtéann tú ag snámh toisc gur féidir le timpistí marfacha tarlú ag tránna a bhfuil tóir orthu.

Ag amanna áirithe den bhliain, bíonn roinnt tránna in Niue dúnta le haghaidh gníomhaíochtaí iascaireachta traidisiúnta.

LADTAI+ Taisteal

Déanann dlí Niue cóir as caidreamh homaighnéasach fireann. Má chiontaítear thú, d’fhéadfaí príosúnacht a ghearradh ort, bíodh is gur annamh a fhorfheidhmítear an dlí.

Taisteal ar bhóithre

Ní mór duit iarratas a dhéanamh ar cheadúnas tiomána áitiúil ó Roinn Póilíneachta Niue.

Bíonn an tiomáint ar thaobh na láimhe clé. Ba cheart duit tiomáint san oíche laistigh de limistéir fhoirgnithe a sheachaint. Ní dhéantar rialacháin sábháilteachta feithiclí a fhorfheidhmiú go seasta. Coimhéad coisithe agus ainmhithe ar na bóithre.

Dlíthe agus Gnásanna Áitiúla

Ná déan dearmad go mbeidh feidhm leis na dlíthe áitiúla ortsa mar chuairteoir, agus is fútsa a bheidh sé cloí leis na dlíthe sin. Bí ar an eolas agus léirigh meas ar ghnásanna, traidisiúin agus cleachtais áitiúla toisc go bhféadfaí a cheapadh go bhfuil d’iompar míchuí, naimhdeach nó mídhleathach fiú.

Sláinte

Fiafraigh de do dhochtúir i bhfad sula dtaistealaíonn tú an dteastaíonn aon vacsaíniú le haghaidh na tíre seo. Molaimid duit árachas taistil cuimsitheach a ghlacadh roimh thaisteal duit.

Tá saoráidí leighis in Niue teoranta. I gcás éigeandála leighis, is dócha gurb é aslonnú go dtí an Nua-Shéalainn an t-aon rogha le haghaidh cóireála. Bí cinnte go gcuimsíonn do pholasaí árachais soláthar d'aslonnú leighis agus go gclúdaíonn sé thú do gach cás.

Rioscaí sláinte

Tá baol ann ó ghalair muiscít-iompartha, lena n-áirítear fiabhras deinge. Ba cheart duit bearta cosanta a ghlacadh le greamanna muiscíte a sheachaint.

Is tinneas é ciguatera a tharlaíonn nuair a itear iasc ina bhfuil tocsainí áirithe. Is féidir leis a bheith ina chúis le masmas, urlacan, agus griofadach ag teacht i méara nó ladhracha agus tinneas tromchúiseach uaireanta. Níl aon bhealach ann chun a fháil amach an bhfuil iasc truaillithe, ach is gnách go ndlúthaíonn éisc sceireacha na tocsainí níos mó ná éisc eile. Is roghanna níos fearr iad éisc dhomhainmhara cosúil le tuinnín, mahi mahi nó wahoo.

Uisce

Moltar go láidir uisce a fhiuchadh agus gan ach uisce i mbuidéil a ól.

Eolas Breise

Riachtanais iontrála (víosa/pas)

Níl eitiltí go Niue ar fáil ach tríd an Nua-Shéalainn, dá bhrí sin beidh ort na riachtanais iontrála don Nua-Shéalainn​a chomhlíonadh.​​

Ní mór do thaistealaithe a thugann cuairt ar Niue ó lasmuigh den Nua-Shéalainn (mar shampla, trí luamh) na riachtanais iontrála teorann don Nua-Shéalainn agus do Niue a chomhlíonadh.

Ní theastaíonn víosa ó thurasóirí le haghaidh cuairteanna suas le 31 lá.