Sábháilteacht agus Slándáil

Staid/corraíl Pholaitiúil

Tá cúrsaí polaitiúla sa Danmhairg réasúnta socair ach féadfaidh taomanna corraíola sóisialta tarlú ó am go chéile, lena n-áirítear, mar shampla, eachtraí ar leith de chlampar sibhialta, go háirithe i réigiún Christania, i gCóbanhávan.

Coimeád ar an eolas i gcónaí faoi na rudaí atá ag tarlú thart timpeall ort trí mhonatóireacht a dhéanamh ar na meáin shóisialta agus trí fhanacht i dteagmháil le d’óstán nó le d'eagraí turais. Seachain léirsithe agus bailiúcháin phoiblí, rudaí ar féidir a thiontú ina rudaí achrannacha.  

Sceimhlitheoireacht

Tá baol sceimhlitheoireachta ann sa Danmhairg, chomh maith leis an riosca atá ag dul ar aghaidh go fóill ar fud an domhain maidir le hionsaithe sceimhlitheoireachta gan idirdhealú, rud a d’fhéadfaí a bheith dírithe ar shaoránaigh, lena n-áirítear áiteanna a dtéann turasóirí agus easaoránaigh go minic.

Coireacht

Tá an leibhéal coireachta réasúnta íseal sa Danmhairg go fóill ach ba cheart duit réamhchúraim chiallmhara a dhéanamh: 

• Ná bíodh do chárta creidmheasa, ticéid taistil agus airgead á n-iompar agat lena chéile - fág airgead tirim spáráilte agus rudaí luachmhara in áit shábháilte. 
• Ná bíodh do phas á iompar agat mura gá leis agus fág cóip de do phas (agus cáipéisí taistil agus árachais) le do theaghlach nó le cairde sa bhaile.
• Cé go bhfuil ráta coireachta réasúnta íseal sa Danmhairg, tá ardú beag tagtha ar choireacht neamh-fhoréigneach le blianta beaga anuas. Tá tarraingt mhór ag piocairí póca ar limistéir phoiblí, phlódaithe le linn an tséasúir turasóireachta agus mar sin bí an-chúramach chun do ghiuirléidí pearsanta a choimeád sábháilte, giuirléidí ar nós pasanna, airgid agus cártaí creidmheasa.

Coireanna a thuairisciú

Más íospartach coireachta thú agus tú sa Danmhairg, déan é a thuairisciú leis na póilíní áitiúla láithreach. Agus féadfaidh tú teagmháil a dhéanamh linn ag Ambasáid na hÉireann i gCóbanhávan má bhíonn cabhair de dhíth ort.

Tiomáint

Má bheartaíonn tú a bheith ag tiomáint sa Danmhairg, ba cheart duit na réamhchúraim chéanna a dhéanamh agus a dhéanfá in Éirinn:

• Bíodh do cheadúnas tiomána Éireannach iomlán leat agus bí cinnte go bhfuil árachas imleor agus oiriúnach agat.
• Bí ar an eolas faoi dhíthe tráchta na Danmhairge; is rud éigeantach é ceannsoilse maolaithe a úsáid an t-am ar fad, bíonn fíneálacha troma ag gabháil le sáraithe páirceála, agus is minic go mbíonn teorannacha luais uirbeacha níos ísle ná mar a bhíonn in Éirinn.
• Féadfaidh oighear a bheith ar na bóithre i rith an gheimhridh. Cuirtear a dhóthain salainn ar na príomhbhóithre i lár Chóbanhávan ach d’fhéadfaí nach gcuirfear a dhóthain orthu lasmuigh den cheantar uirbeach.

Feithicil ar cíos

• Má bhíonn feithicil á fáil ar cíos agat, molaimid duit gan do phas a thabhairt uait mar chineál urrúis. Má ligfear fótachóip a dhéanamh de do phas, coimeád do shúil air i gcónaí.
• Seiceáil go bhfuil árachas imleor agat agus léigh na mionsonraí ar chonradh cíosa na feithicle (go háirithe aon tarscaoileadh a rachaidh i bhfeidhm má dhéantar damáiste don fheithicil).

Rothaithe

Is gnáthrud é an rothaíocht ar bhóithre Danmhargacha agus mar sin bí cúramach, go háirithe nuair a chastar ar dheis, de bharr go bhfuil an ceart bealaigh ag rothaithe. Tá sé ríthábhachtach do chaochspota a sheiceáil do rothaithe sula gcasfar.

Má tá tú ag baint úsáid as iompar poiblí, bí cúramach agus tú ag dul ar bhusanna agus á bhfágáil, de bharr go mbíonn cosáin atá sainithe do rothaithe ann idir an bóthar agus an cosán de ghnáth. Ná siúl ar chosáin rothaithe riamh.

Más mian leat rothar a fháil ar cíos agus tú sa Danmhairg, bí cinnte go mbíonn soilse tosaigh agus cúil a oibríonn orthu, chomh maith le frithchaiteoirí ar bhoinn agus cloigín – mura bhfuil iad siúd agat, téann tú i mbaol fíneála móire a íoc.

Dlíthe agus gnásanna áitiúla

De ghnáth, tarlaíonn séasúr bliantúil na seilge míolta móra “Grindadráp” ar na hOileáin Fharó i míonna an tsamhraidh idir mí Meithimh agus mí Mheán Fómhair. Tá tarraingt mhór ag an imeacht seo ar agóideoirí agus beidh láithreacht sábháilteachta mhéadaithe ann le linn na tréimhse seo. D’fhéadfaí aon duine a d’fhéadfadh a bheith mar bhall de ghníomhartha contúirteacha a ghabhadh, lena n-áirítear don saol agus/nó do mhaoin.

Comhairle phraiticiúil

Cuimhnigh go mbaineann dlíthe áitiúla leat agus tú i do chuairteoir agus go bhfuil sé de dhualgas ort cloí leo. Bí ar an eolas agus léirigh meas ar ghnásanna, ar thraidisiúin agus ar chleachtais áitiúla toisc go bhféadfaí a cheapadh go bhfuil d’iompar míchuí, naimhdeach nó mídhleathach fiú.

Drugaí mídhleathacha

Bíonn pionóis ghéara i gceist le húsáid agus le sealbhú drugaí mídhleathacha (is cuma cén druga atá i gceist), lena n-áirítear fíneálacha agus tréimhsí fada príosúnachta. 

Aitheantas pearsanta

Ba cheart duit aitheantas pearsanta a iompar leat i gcónaí, mar shampla pas nó ceadúnas tiomána.

Tubaistí nádúrtha agus an aeráid

Riachtanais iontrála (víosa/pas)

Ní bhíonn víosa de dhíth ar shaoránaigh de chuid na hÉireann chun teacht isteach sa Danmhairg.

Sláinte

Tá caighdeán na seirbhíse cúraim sa Danmhairg an-ard, agus i gcás éigeandála gortaithe dáiríre, beidh cóir leighis saor in aisce, ach beidh ort íoc as an gcúram a thagann ina dhiaidh. 

Árachas Taistil

Ní féidir linn a íoc as aisdúichiú leighis éigeandála, aisdúichiú coirp, nó costais mar thoradh ar chás éigeandála pearsanta agus tú thar lear. Má cheannaíonn tú polasaí árachais taistil cuí, clúdófar na costais seo, fad agus nach bhfuil na téarmaí agus coinníollacha sáraithe agat.

D’fhéadfaí go leor airgid a shábháil duit féin agus do do theaghlach má cheannófar árachas taistil cuimsitheach má théann rud éigin amú. Cinnteoidh sé chomh maith go bhfaighidh tú an cúram sláinte a bheidh de dhíth ort nuair a bhíonn sé de dhíth ort. Is féidir le billí ospidéil cnuasach go mear ina mílte Euro, agus is féidir na mílte Euro eile a bheith mar chostas ar aslonnú sláinte ar ais go hÉirinn.

Ní hionann gach polasaí, agus d’fhéadfadh cúis a bheith ann go bhfuil an ceann is saoire ar an gceann is saoire. Cinntigh go gclúdaíonn do pholasaí na himeachtaí ar fad a bhfuil sé de phlean agat a dhéanamh ar do thuras. Molann Árachas na hÉireann go gceannaíonn tú polasaí a sholáthraíonn íosmhéid €1 mhilliún clúdach sláinte.

Costais éigeandála

Ba cheart go gcumhdaíonn do pholasaí an méid seo a leanas:

• Gach cúram leighis thar lear, lena n-áirítear aslonnú in aerárthach othar, nó trí ghnáthaimh éigeandála eile, agus aon chostas eile a bhaineann le tréimhse fhanachta níos faide gan choinne.
• Do thuras ar fad, ó fhágann tú go dtí go bhfilleann tú. Cuimhnigh ar pholasaí ilthurais bliantúil má bhíonn níos mó ná turas amháin á dhéanamh agat san aon bhliain amháin.   
• Seirbhís agus cúnamh éigeandála 24 uair an chloig.
• Cumhdach dliteanais phearsanta (ar eagla go gcuirfí cás cúirte i do choinne i dtaca le tú a bheith freagrach as gortú nó damáiste réadmhaoine a dhéanamh).
• Sealúchais a cailleadh nó a goideadh.
• Cealú agus ciorrú.
• Aon ghníomhaíocht bhreise atá de phlean agat a dhéanamh nach gcuimsítear i ngnáthpholasaithe (e.g. gníomhaíochtaí spórt uisce ar nós scairdsciáil nó spóirt ghuaisbheartaíochta eile).

Eisiaimh: Ba cheart duit a bheith ar an eolas nach gclúdaíonn formhór polasaithe árachais tarluithe a bhaineann le halcól nó le drugaí.

Airgeadra

Is é krone na Danmhairge airgeadra na Danmhairge. Ní bhaintear úsáid as airgead tirim chomh minic agus a úsáidtear in Éirinn é, ach tá sé éasca Uathmheaisíní Bainc a aimsiú. Baintear úsáid as cártaí creidmheasa agus dochair d’íocaíochtaí de ghnáth, ach is minic a mhealltar formhuirear ar chártaí eachtracha. 

An Ghraonainn

Ba cheart do thaistealaithe atá ag taisteal chun na Graonlainne a bheith ar an eolas faoi na rioscaí breise atá intuigthe in aeráid chrua na Graonlainne, agus faoi na hachair fhada atá ann maidir le taisteal chun na háite agus mórthimpeall uirthi. D’fhéadfaí go gciallaíonn taisteal de long chrúsála sa tuaisceart go dtógfaidh sé níos faide, laethanta, b’fhéidir, do chúram cuardaigh agus tarrthála teacht. Cuirtear guaiseacha i bhfeidhm trí thaisteal ar tír, agus ba cheart d’aon duine atá ag smaoineamh ar thaisteal ar tír a bheith sásta go bhfuarthas treoraí áitiúil ar cíos a bhfuil taithí aige.

Is saoráid nua-aimseartha, atá feistithe go maith é Ospidéal na Banríona Ingrid in Nuuk, príomhospidéal na Graonlainne. D’fhéadfadh gá a bheith le haslonnú chun na hÍoslainne nó níos faide i gcéin, áfach, de bharr fadhbanna leighis dáiríre. D’fhéadfadh eitiltí den chineál sin a bheith thar a bheith costasach.

É sin ráite, moltar go láidir do thaistealaithe atá ag dul chun réigiún na Graonlainne go bhfaigheann siad árachas taistil imleor chun costas aon chóir leighis a chumhdach nó aslonnú a d’fhéadfadh tarlú.