Sábháilteacht agus Slándáil

Comhairle phraiticiúil

• Léigh an treoir taistil Eolas Roimh Thaisteal chun leideanna slándála áisiúla a fháil maidir le taisteal thar lear
• Faigh eolas go háitiúil maidir le ceantair lena mbaineann baol agus ábhair imní slándála
• Déan réamhchúram ciallmhar maidir le sábháilteacht agus slándáil
• Bíodh an té le dul i dteagmháil leis i gcás éigeandála ar eolas agat

Corraíl

Tá cúrsaí polaitíochta réasúnta cobhsaí san Asarbaiseáin ach uaireanta is féidir le corraíl shibhialta briseadh amach.

Moltar gan taisteal ar chor ar bith go Nagorno-Karabakh ná chuig an limistéar mórthimpeall air atá faoi fhorghabháil mhíleata. Is ceantar é sin atá ina ábhar díospóide leanúnach idir an Asarbaiseáin agus an Airméin agus cé go bhfuil sos comhraic ar bun ó 1994 tuairiscítear tréimhsí gunnalámhaigh feadh na Líne Teagmhála. D’fhéadfadh go leor mianach talún a bheith i roinnt áiteanna.

Níor chóir duit iarracht a dhéanamh dul chun na hAsarbaiseáine ná an tír a fhágáil trí na teorainneacha talún leis an Rúis (ie an Dagastáin) mar go bhfuil siad dúnta do náisiúnaigh eachtracha.

Bíodh a fhios agat cad atá ar siúl i do thimpeall i gcónaí  trí mhonatóireacht a dhéanamh ar na meáin áitiúla, agus fanacht i dteagmháil le do theagmhálaí áitiúil, óstán nó do thionscnóir turas. Agus seachain léirsithe agus tionóil phoiblí, atá in ann éirí achrannach uaireanta. 

Sceimhlitheoireacht

Cé go bhfuil an baol ó sceimhlitheoireacht san Asarbaiseáin íseal, tá baol domhanda ann fós ó ionsaithe sceimhlitheoireachta neamh-idirdhealaitheacha, a d’fhéadfadh a bheith dírithe ar thargaidí sibhialta, lena n-áirítear áiteanna ina gcruinníonn turasóirí agus easaoránaigh.

Coiriúlacht

Tá ráta coiriúlachta sách íseal san Asarbaiseáin ach ba chóir duit réamhchúram ciallmhar a dhéanamh mar sin féin:

• Ná bíodh do chárta creidmheasa, do thicéid taistil ná do chuid airgid ar iompar in éineacht agat – fág airgead breise agus nithe luachmhara in áit shábháilte.
• Ná bíodh do phas ar iompar agat ach amháin má tá géarghá leis agus fág cóip de do phas (agus de do dhoiciméid taistil agus árachais) le do theaghlach nó le cairde sa bhaile.
• Ná taispeáin méideanna móra airgid go poiblí agus ná bain úsáid as ATManna tar éis thitim na hoíche, go háirithe má bhíonn tú leat féin. Seiceáil nach bhfuil aon duine do do leanúint tar éis duit do chuid gnó a chur i gcrích.
• Seachain sráideanna agus staighrí dorcha nó gan soilse. Socraigh síob a fháil ó/go dtí chomh gar do dhoras d'óstáin/d'árasáin agus is féidir.
• Coinnigh súil ghéar ar do chuid stuif agus coinnigh greim air in áiteanna poiblí mar caiféanna idirlín agus stáisiúin bus nó traenach.

Mionghadaíocht

Tá roinnt mugálacha foréigneacha tarlaithe d’eachtrannaigh.  Tarlaíonn formhór na n-eachtraí tar éis thitim na hoíche i lár Baku thart ar bheáir agus clubanna ar stíl an iarthair. Ba chóir duit a bheith cúramach go háirithe agus tú ag dul isteach i nó ag fágáil d’óstáin nó d’árasáin.

Coiriúlacht a chur in iúl

Má fhulaingíonn tú coir agus tú san Asarbaiseáin, cuir in iúl do na póilíní láithreach é.  Féadfaidh tú teagmháil a dhéanamh linn ag Ambasáid na hÉireann in Ankara má tá cabhair uait.

Tiomáint

Má tá sé i gceist agat a bheith ag tiomáint san Asarbaiseáin, ba chóir duit a bheith cúramach, go háirithe má bhíonn tú ag tiomáint san oíche. Tá coinníollacha tiomána strusmhar agus corrach. De ghnáth níl soilse ar bhóithre agus tá bóithre ar dhroch-chaighdeán agus déantar droch-chothabháil ar charranna.  Más mian leat a bheith ag tiomáint:

• Tabhair leat do cheadúnas tiomána idirnáisiúnta agus bí cinnte go bhfuil árachas iomchuí agus dóthanach agat
• Tá sé in aghaidh an dlí tiomáint faoi thionchar an óil nó drugaí agus tá baol go gcoinneofaí tú, go gcuirfí fíneáil ort nó go gcuirfí toirmeasc ar thiomáint ort dá mbéarfaí ort
• Bí ar an eolas faoi dhlíthe tráchta na hAsarbaiseáine, mar shampla luasteorainneacha
• Caith crios sábhála i gcónaí
• Coinnigh doirse na feithicle faoi ghlas agus ná bíodh málaí le feiceáil, ar fhaitíos go ndéanfaí iarracht iad a ghoid agus tú stoptha ag soilse tráchta

Feithicil a fhruiliú

Má tá feithicil á fruiliú agat, moltar duit gan do phas a thabhairt ar lámh mar shlándáil.  Fiú má thugann tú cead do phas a fhótachóipeáil, bíodh sé le feiceáil agat an t-am ar fad.

Seiceáil go bhfuil árachas dóthanach agat agus léigh téarmaí & coinníollacha an chonartha fruilithe feithicle (go háirithe aon tarscaoileadh a mbeadh feidhm leis dá ndéanfaí damáiste don fheithicil).

Tacsaithe

Bí eolach nach bhfuil criosanna sábhála i bhformhór na dtacsaithe atá níos sine.

Dlíthe agus gnásanna áitiúla

Comhairle phraiticiúil

• Léigh an chomhairle taistil, cuir tú féin ar an eolas sula dtaistealaíonn tú agus faigh comhairle go háitiúil nuair a bhaineann tú ceann scríbe amach
• Cuimhnigh go mbaineann na dlíthe áitiúla leatsa, mar chuairteoir, agus nach mór duit cloí leo
• Bí measúil ar nósanna, ar thraidisiúin agus ar chleachtais áitiúla, mar go mb’fhéidir go bhféachfaí ar an gcaoi a n-iompraíonn tú tú féin mar iompar a bheadh as bealach, naimhdeach nó in aghaidh an dlí

Drugaí neamhdhleathacha

Gearrtar pionós géar ar úsáid drugaí neamhdhleathacha (is cuma cén druga é), lena n-áirítear fíneálacha agus téarmaí príosúin fada.

Cultúr áitiúil

Caitheann mná áitiúla agus eachtracha éadaí ar stíl an iarthair de ghnáth. Níor chóir, áfach, d’fhir agus do mhná brístí gearra a chaitheamh sa tsráid mar go bhféadfaí aird a tharraingt nach bhfáilteofaí roimhe.

Homaighnéasachas

Tá gníomhaíocht homaighnéasach dleathach san Asarbaiseáin, ach easaontaíonn go leor de mhuintir na hAsarbaiseáine le gean a léiriú go poiblí. Moltar a bheith cúramach agus discréideach i gcónaí.

Creideamh

Is sochaí shaolta den chuid is mó san Asarbaiseáin agus de ghnáth meastar gur ábhar príobháideach é creideamh. Is Moslamaigh atá i bhformhór an daonra.

Grianghrafadóireacht

Seachain pictiúir a thógáil de láithreáin mar bhunáiteanna, trealamh agus suiteálacha míleata, cibé cén bhail atá orthu. Meastar gur áiteanna íogaire iad agus coimeádadh agus ceistíodh turasóirí nuair a thriail siad pictiúir a thógáil díobh.

Ba chóir duit a bheith eolach freisin maidir le híogaire cultúir agus pictiúir á dtógáil agat de shéipéil agus láithreáin chráifeacha eile. Iarr cead má tá aon amhras ort.

Tubaistí nádúrtha agus an aeráid

Comhairle phraiticiúil

‌Crith Talún

Tá an Asarbaiseáin suite i gcrios seismeach gníomhach; ach ní raibh aon chreathanna talún tromchúiseacha ann le déanaí.

Eolas Breise

Riachtanais iontrála (víosa/pas)

Ní mór do náisiúnaigh na hÉireann a fhanann in Asarbaiseáin níos faide ná 3 lá, clárú leis an stáisiún póilíni is gaire dóibh, taobh istigh de 3 lá oibre ón lá a shroicheann siad an tír. D’fhéadfadh óstáin faoi leith an tseirbhís seo a thairiscint dá n-aíonna ach, ní mór do chuairteoirí atá ag fanacht in árasáin nó in árasáin chónaithe phríobháideacha clárú as a stuaim féin. Tá gach taistealaí freagrach as comhlánú an chlárúcháin a chinntiú. Is féidir treoir maidir leis an bpróiseas a fháil ar leathanaigh Bhéarla láithreán gréasáin na Seirbhíse Imirce Stáit. Éilítear orthusan ar mian leo fanacht sa tír níos faide ná 30 lá, clárú le haghaidh cárta cónaithe. Is féidir treoir a fháil anseo.

Gearrfar fíneálacha mura ndéanfar an clárú in am.

Víosaí

Teastaíonn víosa ó shaoránaigh na hÉireann le dul chun na hAsarbaiseáine. Ní fhéadfaidh tú víosa a fháil nuair a thiocfaidh tú chun na hAsarbaiseáine dá bhrí sin ní mór duit víosaí agus riachtanais iontrála eile a sheiceáil amach roimh ré ón Ambasáid nó Consalacht is gaire de chuid na hAsarbaiseáine.

Pasanna

Moltar duit roinnt fótachóipeanna de do phas a thabhairt leat. Ba chóir duit fótachóip de do phas a iompar an t-am ar fad le linn do chuairte.

Sláinte

Seiceáil le do dhochtúir i bhfad roimh thaisteal má tá aon vacsaíniú ag teastáil le dul chun na hAsarbaiseáine.