Comhdháil Ghnó Mheicsiceo-Bhaile Átha Cliath
Díríonn an Tánaiste ar acmhainneacht na hÉireann mar gheata chun na hEorpa do ghnólachtaí Mheiriceá Laidinigh atá ag iarraidh infheistíocht agus leathnú a dhéanamh
Dhírigh an Tánaiste agus Aire Gnóthaí Eachtracha agus Trádála, Eamon Gilmore, T.D., ar acmhainneacht na hÉireann mar gheata chun na hEorpa do ghnólachtaí Mheiriceá Laidinigh a bhí ag iarraidh infheistíocht agus leathnú a dhéanamh.
Agus príomhaitheasc á thabhairt aige do cheannairí gnó as Meicsiceo a bhí ag freastal ar an gcéad Chomhdháil Ghnó Mheicsiceo-Bhaile Átha Cliath, dúirt an Tánaiste:
“Tá breis agus 1,000 cuideachta thar lear tar éis Éire a roghnú mar bhonn straitéiseach san Eoraip. Tá ocht as na deich gcuideachta ICT domhanda is mó, naoi gcinn as na deich gcuideachta cógaisíochta domhanda is mó, agus gach ceann de na deich gcuideachta ar líne is mó ar domhan bunaithe in Éirinn. Rangaigh staidéir neamhspleácha Éire sa gcéad áit ar domhan mar gheall ar sholúbthacht agus ar inoiriúnaitheacht ár bhfórsa oibre agus Baile Átha Cliath mar an chathair is fearr ar domhan dá caipiteal daonna.
“Tá téarnamh inbhuanaithe ar siúl in Éirinn agus 5,000 jab nua á gcruthú gach mí. Bhí onnmhairithe agus infheistíocht isteach lárnach sa téarnamh seo, agus tá an Rialtas meáite ar na beartais agus ar an timpeallacht rialála a d’éascaigh an cur chuige cruthaitheach agus seachtrach seo a choinneáil.
Is í Meicsiceo an comhpháirtí trádála is mó atá ag Éirinn i Meiriceá Laidineach. D’onnmhairigh Éire luach €690 milliún d’earraí go Meicsiceo in 2013, beagnach trí uaire luach ár n-onnmhairithe in 2000. Tá cuideachtaí Éireannacha – sna hearnálacha pacáistithe agus agraibhia agus níos mó agus níos mó anois san eitlíocht – ag breathnú ar Mheicsiceo do chomhpháirtíochtaí atá lárnach d’oscailt mhargaí nua agus d’fhorbairt chaidreamh trádála nua. Tá cuideachtaí as Meicsiceo ar lorg comhpháirtithe nua freisin d’infheistíocht agus do chomhoibriú. Ba mhaith liom a cheapadh go bhfaighidh sibhse amach, sibhse a thaistil go Baile Átha Cliath, gurb í Éire a bheidh ina geata chun na hEorpa díobh”.
Tá caidreamh idir Éire agus Meicsiceo ag dul i méid go láidir, go háirithe le cuairt Uachtarán na hÉireann, Michael D Higgins ar Mheicsiceo an bhliain seo caite. Beidh Comhdháil Ghnó na seachtaine seo ina céim thábhachtach i bhforbairt chaidreamh déthaobhach Mheicsiceo-na hÉireann.
Tabharfaidh an tAire Trádála agus Forbartha, Joe Costello T.D., a sheol an Fóram Trádála Mheiriceá Laidinigh le deireanaí, tionscnamh de chuid Chumann Onnmhaireoirí na hÉireann, aitheasc do thoscairí freisin i dTeach Uíbh Eachach ar an Aoine, 2 Bealtaine.
Mheall an Chomhdháil Ghnó Mheicsiceo-Bhaile Átha Cliath, ar thionscnamh é de chuid Ard-Mhéara Bhaile Átha Cliath, an Comhairleoir Oisín Quinn, suim láidir ó phobail ghnó i Meicsiceo agus in Éirinn.
