Lá Fhéile Pádraig 2014

Taidhleoireacht Eacnamaíoch na hÉireann i nGníomh

Thar séasúr Lá Fhéile Pádraig 2014, thug an Líonra Ambasáidí, i gcomhar leis na gníomhaireachtaí Stáit, faoi chlár leathan gníomhaíochtaí chun tacú le trádáil, turasóireacht agus infheistíocht agus chun tógáil ar dhea-cháil na hÉireann go hidirnáisiúnta.

Áiríodh air sin:

• Bhí an Taoiseach, an Tánaiste agus Airí i gceannas ar 30 cuairt a bhí dírithe ar thrádáil thar shéasúr Lá Fhéile Pádraig. Chabhraigh Ambasáidí agus Consalachtaí na hÉireann – a bhfuil triúr taidhleoirí nó níos lú mar fhoireann ag an gcuid is mó díobh – le meánmhéid de 17 ócáid an duine a reáchtáil ar fud 133 cathair agus 68 tír chun Éire a chur chun cinn.
• Ghlac an Taoiseach, an Tánaiste, Airí agus taidhleoirí páirt i 115 ócáid le cuideachtaí a raibh sé de chumas acu tacú le naisc thráchtála, deiseanna easpórtála nó infheistíochtaí nua a bhaint amach. Fógraíodh nó daingníodh gnó nua láithreach arbh fhiú €5m é d’easpórtálaithe na hÉireann le linn na gcuairteanna thar an séasúr.
• Rinne an Taoiseach, an Tánaiste, Airí agus an líonra Ambasáidí, mar aon leis an IDA, Fiontraíocht Éireann agus Gníomhaireachtaí Stáit eile, trádáil, turasóireacht agus infheistíocht in Éirinn a chur chun cinn ag 108 imeacht gnó breise ar leith, ar fhreastail os cionn 13,600 duine ó chuideachtaí Éireannacha agus idirnáisiúnta orthu.
• Chabhraigh an líonra Ambasáidí le 76 suíomh íocónach a ‘Ghlasú’ mar chuid d’fheachtas Tourism Ireland ar fud an domhain agus bhí tionchar ollmhór aige sin i measc na meán. Bhí rannpháirtíocht ghníomhach an líonra Ambasáidí ríthábhachtach maidir leis na suíomhanna ‘Glasa’ sin a chur i gcrích, lena n-áirítear Balla Mór na Síne, Ciste Petra agus Pirimidí Giza agus an Sfioncs agus an dealbh de Chríost an Slánaitheoir i Rio de Janeiro a ghlasú don dara huair.

• Bhí lucht féachana de os cionn 353,000 ag imeachtaí taidhleoireachta poiblí arna n-óstáil nó arna dtacú ag an líonra Ambasáidí, nó arna gcur i láthair go díreach ag an Taoiseach, an Tánaiste, Airí agus an líonra Ambasáidí. Thug sé sin deis iontach teachtaireachtaí comhordaithe maidir le turasóireacht, trádáil agus infheistíocht a chur in iúl agus chun próifíl dhearfach na hÉireann a ardú go hidirnáisiúnta. Maidir leis na himeachtaí a d’eagraigh an líonra Ambasáidí, ullmhaíodh Ireland Inspires agus físeáin chur chun cinn eile, chomh maith le pacáistí bia ó Bhord Bia, agus dáileadh ar mhisin iad.
• Ghlac an Taoiseach, an Tánaiste, Airí agus taidhleoirí páirt i 124 cruinniú polaitiúil ardleibhéil arna n-eagrú ag an líonra Ambasáidí.
• Chuir an Taoiseach, an Tánaiste, Airí agus an líonra Ambasáidí teachtaireachtaí tábhachtacha maidir le trádáil, turasóireacht agus infheistíocht chun cinn in eagarfhocail tuairimíochta agus in agallaimh sna meáin idirnáisiúnta a raibh lucht féachana 23.5 milliún duine acu, agus sin meastachán an-choimeádach. Nuair a áirítear clúdach na meán thar lear ar imeachtaí a bhí mar chuid de na cuairteanna ardleibhéil nó ar thug an líonra Ambasáidí tacaíocht dóibh, baineadh lucht féachana níos leithne de 80 milliún duine ar an laghad amach.