An tAire Creighton le haitheasc a thabhairt ag Comhdháil Bloomberg ar Fhiachas Ceannasach

Tá an tAire Stáit um Ghnóthaí Eorpacha, Lucinda Creighton, T.D., i Nua-Eabhrac chun freastal ar Chomhdháil Bloomberg ar Fhiachas Ceannasach. Tá sé beartaithe ag an Aire an deis a thapa chun cuntas a thabhairt ar dhul chun cinn geilleagrach na hÉireann agus béim a leagadh ar an gcaidreamh trádála tábhachtach idir na Stáit Aontaithe agus an tAontas Eorpach.

Ag labhairt i Nua-Eabhrac, dúirt an tAire Creighton:

“Is cúis áthais dom é a bheith in ann páirt a ghlacadh san imeacht seo. Tá sé tábhachtach aitheantas a thabhairt do shuntasacht an chaidrimh trádála ní hamháin idir Éire agus na Stáit Aontaithe ach idir an AE agus na SA chomh maith.

D’infheistigh cuideachtaí ón dá réigiún $2 trilliún i margaí a chéile anuraidh. Tá an scóip ann chun é seo a mhéadú níos mó. Mhéadódh beartas taraife nialais idir na SA agus an AE an OTI faoi thart ar $180 billiún i gcaitheamh 5 bliana, níos mó ná an acmhainneacht ó chonclúid rathúil na gcainteanna trádála DOHA”.

Agus í i Nua-Eabhrac thapaigh an tAire an deis freisin bualadh le teagmhálaithe sna Náisiúin Aontaithe agus i Stocmhalartán Nua-Eabhrac.